Энэ нь түр зуурын тасалдал гэхээсээ илүү салбарын бүтцийн өөрчлөлт шиг харагдаж эхэллээ.
Дэлхийн нийт гангийн тал хувийг дангаараа үйлдвэрлэдэг Хятад улс дөрөвдүгээр сард 86.63 сая тонн ган үйлдвэрлэсэн нь 2025 оны мөн үеийнхээс 2.8 хувиар буурсан үзүүлэлт бөгөөд 2018 оноос хойших хамгийн сул дөрөвдүгээр сар боллоо.
Энэ оны эхний дөрвөн сарын байдлаар гангийн үйлдвэрлэл 331.12 сая тоннд хүрсэн нь өнгөрсөн оны мөн үетэй харьцуулахад 4.1 хувиар буурсан үзүүлэлт юм.
Гэвч албан ёсны мэдээллээс үзвэл, эхний дөрвөн сард төмрийн хүдрийн импорт 8 хувиар өсөж, 418.6 сая тоннд хүрсэн байна.
Гангийн гол түүхий эдийн дөрөвдүгээр сарын импорт 103.9 сая тоннд хүрсэн нь гуравдугаар сарын 104.74 сая тонноос 0.8 хувиар буурсан үзүүлэлт юм.
Тавдугаар сарын импорт харьцангуй өндөр хэвээр байх төлөвтэй байгаа бөгөөд "DBX Commodities" компанийн шинжээчид далайгаар тээвэрлэн ирэх хүдрийн хэмжээг 104.67 сая тонн болно гэж таамаглаж байна.
Дөрөвдүгээр сард гангийн экспорт өнгөрсөн оны мөн үеийнхээс 9 хувиар буурч, 9.5 сая тоннд хүрчээ.
2026 оны эхний дөрвөн сарын байдлаар гангийн экспорт 9.7 хувиар буурч, 34.2 сая тонн болсон байна.
Төмрийн хүдрийн импорт ийнхүү өндөр байгааг түр зуурын болон бүтцийн хүчин зүйлсийн аль алинаар нь тайлбарлаж болохоор байна.
Түр зуурын гол хүчин зүйл нь нөөцийн дахин бүрдүүлэлт бөгөөд "SteelHome" зөвлөх компанийн хяналт тавьдаг боомтуудын нөөцийн хэмжээ түүхэн дээд цэгтээ ойрхон байна.
Тавдугаар сарын 22-ны байдлаар нөөцийн хэмжээ 160.35 сая тонн байсан нь өмнөх долоо хоногийн 160.34 сая тонноос ялимгүй өссөн бөгөөд гуравдугаар сарын 20-ны долоо хоногт хүрсэн түүхэн дээд үзүүлэлт болох 165.67 сая тоннд ойрхон хэвээр байна.
Нөөц нь ихэвчлэн жилийн эцсээр нэмэгдэж, шинэ оны эхээр оргилдоо хүрдэг бөгөөд барилгын салбарын эрэлтийг хангахын тулд гангийн үйлдвэрлэл эрчимжих үед буюу жилийн дунд үе рүүгээ эргээд буурдаг байна.
Зах зээлийн хувьд тулгамдаж буй асуулт нь нөөцийн хэмжээ нь зуны улирал эхлэхэд өмнөх улирлын шинж чанартай зүй тогтлоо даган буурах уу, эсвэл гангийн үйлдвэрлэлээс шалтгаалан өмнөх жилүүдийнхээс өндөр түвшинд хадгалагдсаар байх уу гэдэгт байна.
Мөн Ираны дайн болон үүнээс үүдэн Хормузын хоолой бараг хаагдмал байгаа нь Азийн түлш, шатахууны нийлүүлэлтэд заналхийлж байгаа явдал юм. Энэ нь Хятадын гангийн үйлдвэрүүд болон худалдаачдыг ирээдүйд нийлүүлэлт тасалдаж болзошгүй гэсэн үүднээс төмрийн хүдрийг илүү ихээр импортлоход хүргэсэн байх талтай.
Төмрийн хүдрийн үнийн тогтвортой байдал ч импортлох сонирхлыг нэмэгдүүлж байна. Сингапурын биржийн гэрээний үнэ сүүлийн 10 сарын хугацаанд нэг тонн нь 105 ам.долларын орчимд хэлбэлзэж байна. Даваа гарагт фьючерс гэрээний үнэ нэг тонн нь 109.09 ам.доллароор хаагдсан байна.
Төмрийн хүдрийн импортыг хөдөлгөж буй урт хугацааны хүчин зүйл нь Хятадын дотоодын төмрийн хүдрийн олборлолт бага багаар буурч байгаа явдал юм. Үүн дээр хүдрийн агуулга муудаж байгаа нь нөхцөл байдлыг улам хүндрүүлж байна. Энэ нь ижил хэмжээний хүдрээс гарах цэвэр төмрийн агуулга бас багасаж байна гэсэн үг юм.
"MySteel"-ийн мэдээллээр, Хятадын төмрийн хүдрийн олборлолт энэ оны эхний дөрвөн сард 326.8 сая тонн болсон нь өнгөрсөн оны мөн үеийнхээс 1 хувиар буурчээ.
Үүний өмнө 2025 онд олборлолт 2.8 хувиар буурч 983 сая тонн болсон бол 2024 онд 1.04 тэрбум тонн байсан юм.
Хятадын дотоодын төмрийн хүдрийн төмрийн дундаж агуулга ердөө 20-30 хувь байдаг тул импортын хүдрийн 60-65 хувийн агуулгад хүргэхийн тулд баяжуулах шаардлагатай болдог. Энэ нь зардал өндөртэй, эрчим хүч их шаарддаг.
