Дойче Банкны мэдээлснээр, дэлхий ертөнц улам бүр талцан хуваагдаж, улс орнууд ам.доллароос татгалзан алт руу шилжиж байгаа нь алтны эрэлтийг нэмэгдүүлж байна.
Дойче Банкны Даваа гарагт гаргасан тайланд дурдсанаар төв банкууд 2008 оны санхүүгийн хямралаас хойш нөөцдөө 225 сая унци алт нэмжээ. Үүний зэрэгцээ, 2000-аад оны эхээр нийт нөөцийн 60 гаруй хувийг эзэлж байсан ам.долларын хадгаламж өнөөдөр 40 орчим хувь болж буурсан байна.
Алтны худалдан авалтыг зөвхөн Хятад, Орос, Энэтхэг, Турк зэрэг томоохон эзэмшигчид хийгээд зогсохгүй, Казахстан, Саудын Араб, Катар, Египет, Арабын Нэгдсэн Эмират зэрэг орнууд нэмэгдсээр байна.
Хэрэв энэ хандлага үргэлжилбэл дэлхийн төв банкуудын нөөцөд эзлэх алтны хэмжээ одоогийн 30%-иас 40%-д хүрэх боломжтой гэж таамаглаж байна. Энэхүү хуваарилалтад үндэслэн Дойче Банкны хийсэн симуляциар алтны үнэ ирэх таван жилийн хугацаанд нэг унци нь 8,000 ам.долларт хүрэх боломжтойг харуулсан нь одоогийн түвшнээс бараг 80%-иар өснө гэсэн үг юм.
Хэдийгээр энэхүү тооцоолол нь албан ёсны урьдчилсан таамаг бус, зөвхөн концепц төдий боловч АНУ-ын хөрөнгөд итгэх итгэл суларч, дэлхий даяар ам.доллароос татгалзах хөдөлгөөн өрнөж буй энэ үед алт үнэд орох нь тодорхой байна.
Дэлхийн Алтны Зөвлөлөөс өнгөрсөн жил явуулсан судалгаагаар төв банкууд алт хуримтлуулах шийдвэр гаргахад эдийн засаг болон геополитикийн тодорхойгүй байдал гол нөлөө үзүүлж байгааг онцолжээ.
