Канадын гангийн салбар АНУ-ын импортын тарифын нөлөөгөөр экспортын зах зээлдээ томоохон цохилт амссан ч дотоодын эрэлт нэмэгдэж, Засгийн газраас санхүүгийн болон бодлогын дэмжлэг үзүүлсний үр дүнд аажмаар сэргэх шинж тэмдэг ажиглагдаж эхэлжээ. Тус улсын ган үйлдвэрлэгчид уламжлалт гол зах зээл болох АНУ-аас хамаарах хамаарлаа бууруулж, дотоодын хэрэглэгчдэд нийлүүлэх бүтээгдэхүүний хэмжээг нэмэгдүүлэхэд анхаарч байна. Reuters агентлагийн мэдээлснээр, АНУ-ын Ерөнхийлөгч Дональд Трамп 2025 оны зургаадугаар сард импортын гангийн тарифыг 25 хувиас 50 хувь болгон нэмэгдүүлснээс хойш Канадын ган үйлдвэрлэгчид борлуулалтын стратегиа өөрчлөхөөс өөр аргагүйд хүрчээ. Канад өмнө нь гангийн экспортынхоо ойролцоогоор 90 хувийг АНУ-д нийлүүлдэг байсан бол 2025 онд тус улс руу гаргасан гангийн нийлүүлэлт 60 орчим хувиар буурсан байна. Үүний улмаас салбарын хэдэн зуун ажилтан ажлаас халагдаж, зарим үйлдвэр үйлдвэрлэл болон ажиллах хүчний бүтцээ өөрчлөхөд хүрчээ. Гэсэн хэдий ч дотоодын зах зээлд Канадын үйлдвэрлэсэн гангийн эзлэх хувь нэмэгдсэн нь салбарын хувьд нааштай үзүүлэлт болж байна. АНУ-ын тарифын дарамтыг бууруулах нэг гол арга нь импортын бүтээгдэхүүнээс хамаарах хамаарлыг багасгаж, дотоодын үйлдвэрлэгчдэд зах зээлээ тэлэх боломж бүрдүүлэх явдал болж байна. Канадын гангийн салбарын үйлдвэрчний эвлэл болох United Steelworkers-ийн тооцоогоор, 2024 онд Канадын дотоодын гангийн хэрэглээний 41 хувийг тус улсад үйлдвэрлэсэн гангаар хангаж байсан бол 2025 онд энэ үзүүлэлт 51 хувьд хүрчээ. Харин импортын гангийн эзлэх хувь мөн хугацаанд 59 хувиас 49 хувь болж буурсан байна. Эдгээр тооцоог дэлхийн гангийн үйлдвэрлэл, худалдааны мэдээлэл болон Канадын импортын статистикт үндэслэн гаргажээ. Канадын гангийн салбарт шинэ захиалга бий болгож буй гол хүчин зүйлсийн нэг нь томоохон дэд бүтцийн болон аж үйлдвэрийн төслүүд юм. Ялангуяа тус улсын баруун бүс нутагт уул уурхай, газрын тос, байгалийн хий, эрчим хүч, барилга угсралтын салбарын хөрөнгө оруулалт гангийн хэрэглээг нэмэгдүүлж байна. Үүнээс гадна хиймэл оюун ухааны тооцооллын хүчин чадлыг нэмэгдүүлэх зорилготой дата төвүүдийн бүтээн байгуулалт ган бүтээгдэхүүний эрэлтийг дэмжих төлөвтэй байна. Саскачеван мужид 1.2 гигаваттын хүчин чадалтай дата төвийн төсөл хэрэгжиж байгаа нь ийм төрлийн бүтээн байгуулалтын нэг жишээ юм. 2026 оны тавдугаар сард Канадын Засгийн газар ган, хөнгөн цагаан, зэсийн салбарын компаниудад эргэлтийн хөрөнгийн санхүүжилт олгох зорилгоор нийт нэг тэрбум канад долларын зээл олгох хөтөлбөр зарласан. Энэхүү санхүүжилт нь АНУ-ын тарифын нөлөөгөөр орлого, мөнгөн урсгал нь хүндрэх эрсдэлтэй компаниудад үйл ажиллагаагаа үргэлжлүүлэхэд туслах зорилготой юм. Мөн гадаадын гангийн импортод тавих квотын хязгаарлалтыг сунгаж, хямд үнэтэй импортын бүтээгдэхүүн дотоодын үйлдвэрлэгчдэд үзүүлэх дарамтыг бууруулах арга хэмжээ авчээ. Гэсэн хэдий ч дэлхийн зах зээлд гангийн үйлдвэрлэлийн илүүдэл хүчин чадал байгаа нөхцөлд Канадын үйлдвэрлэгчид БНХАУ, БНСУ зэрэг харьцангуй бага өртгөөр ган үйлдвэрлэдэг орнуудын бүтээгдэхүүнтэй өрсөлдөхөд хүндрэлтэй хэвээр байна. Иймээс импортын зохицуулалт, төрийн худалдан авалт, санхүүгийн дэмжлэг нь салбарын өрсөлдөх чадварт нөлөөлөх чухал хүчин зүйл болж байна. Тус улс жилд ойролцоогоор 13 сая тонн анхдагч ган үйлдвэрлэдэг бөгөөд дэлхийн гангийн зах зээлд харьцангуй бага хувийг эзэлдэг.