Оны эхний есөн сарын нийт үйлдвэрлэл өмнөх оны мөн үеэс 8.3%-иар буурсан байна. Тус компани жилийн эцсийн үйлдвэрлэлийн төлөвөө хэвээр хадгалж, 2026 онд нийт 625,000–655,000 тонн зэс үйлдвэрлэхээр тооцоолжээ. Гуравдугаар улирлын үйлдвэрлэлийн өсөлтөд Чилийн Лос-Пеламбрес уурхайн олборлолт сэргэж, өмнөх улиралд хуримтлагдсан нөөцөө ашиглан нийлүүлэлтээ нэмэгдүүлсэн нь голлон нөлөөлсөн байна. Тус уурхай долоодугаар сард хүчтэй аадар борооны улмаас үйл ажиллагаа нь саатсан байсан ч гуравдугаар улиралд үйлдвэрлэлээ сэргээжээ. Antofagasta компанийн зэсийн үйлдвэрлэл оны эхний улиралд 7.6%-иар буурсан нь жилийн үйлдвэрлэлийн анхны төлөвөө бууруулахад хүргэсэн юм. Үүнд Чилийн Сентинел уурхайн хүдрийн агуулга буурч, хүдрээс зэс ялган авах үзүүлэлт муудсан нь нөлөөлжээ. Үүний улмаас компани 2026 оны үйлдвэрлэлийн таамгаа өмнө нь 650,000–700,000 тонноос 625,000–655,000 тонн болгон бууруулсан байна. Эхний есөн сарын байдлаар тус компани нийт 436,900 тонн зэс үйлдвэрлэсэн нь өмнөх оны мөн үеийн үзүүлэлтээс бага байгаа юм. Иймээс жилийн эцсийн зорилтоо биелүүлэхийн тулд дөрөвдүгээр улиралд үйлдвэрлэлээ үргэлжлүүлэн нэмэгдүүлэх шаардлагатай байна. Үүний зэрэгцээ үйлдвэрлэлийн зардал нэмэгдэж байгаа нь компанийн үйл ажиллагаанд дарамт учруулж байна. Тус компани дайвар бүтээгдэхүүний орлогыг хасахаас өмнөх нэг фунт зэс үйлдвэрлэх мөнгөн зардлын жилийн төлөвөө 2.40–2.60 ам.доллараас 2.60–2.70 ам.доллар болгон нэмэгдүүлжээ. Үүнд дэлхийн зах зээл дээрх дизель түлшний үнэ өндөр хэвээр байгаа нь нөлөөлсөн байна. Ийнхүү Antofagasta компанийн гуравдугаар улирлын үйлдвэрлэл сэргэж байгаа ч оны эхний хагаст алдсан үйлдвэрлэлийн хэмжээг нөхөх, нэмэгдэж буй зардлаа хянах шаардлага хэвээр байна. Цаашдын үйлдвэрлэлийн гүйцэтгэл нь уурхайн үйл ажиллагааны тогтвортой байдал, хүдрийн агуулга болон өргөтгөлийн төслүүдийн хэрэгжилтээс ихээхэн хамаарах төлөвтэй байна.