Энэхүү импортын хязгаарлалтын алхам нь АНУ-ын эрчим хүчний сүлжээн дэх Хятадад үйлдвэрлэсэн тоног төхөөрөмжийн хамаарлыг бууруулах зорилготой гэж салбарын мэргэжилтэнүүд онцолж байна.
Гэхдээ энэ нь зөвхөн Хятадад үйлдвэрлэсэн бэлэн бүтээгдэхүүнийг хилээр нэвтрүүлэхийг хориглох төдий биш, АНУ-ын үндэсний аюулгүй байдал, кибер аюулгүй байдлыг хамгаалах нэрээр хийгдэж буй "нийлүүлэлтийн сүлжээний хориг" гэж албаны эх сурвалжууд тайлбарлаж байна.
Захирамжид дурдсан АНУ-ын эрчим хүчний сүлжээ болон дата төвүүдэд ашиглагддаг трансформатор, инвертер, батерейны хуримтлуур (BESS), өндөр хүчдэлийн таслуур зэрэг төхөөрөмжүүдийг "Халдлагад өртөмтгий, үндэсний аюулгүй байдалд заналхийлж байна" гэж үзэж байгаа тул АНУ-ын компаниуд эдгээрийг Хятад улсаас чөлөөтэй импортолж ашиглах эрхийг шууд хязгаарлаж байна.
Гэхдээ бодит байдал дээр АНУ-ын эрчим хүчний сүлжээний тоног төхөөрөмжийн нийлүүлэлтэд Хятад улсын эзлэх хувь хэмжээ уг захирамж гаргахаас өмнө тогтмол буурсан үзүүлэлттэй байсан байна. Тухайлбал, 2026 оны 6 дугаар сар хүртэлх 12 сарын хугацаанд АНУ-ын трансформаторын импортын 3%, таслуурын импортын 1%-иас бага хувийг Хятад улс нийлүүлжээ. Үүний оронд Өмнөд Солонгос, Мексик, Канад улсууд таслуурын импортын 74%, трансформаторын импортын 48%-ийг бүрдүүлж байна. Hyosung Heavy Industries компани 9 дүгээр сарын 15-нд АНУ-ын хоёр том дата төвийн hyperscalers компаниудтай 285.3 тэрбум долларын хэт өндөр хүчдэлийн трансформатор нийлүүлэх гэрээ байгуулснаа зарласан байна. АНУ-ын "45X" дэвшилтэт үйлдвэрлэлийг дэмжих үйлдвэрлэлийн зээлийн ачаар инвертерийн угсралт АНУ дотооддоо шилжиж, Хятадаас АНУ руу хийх экспортын хэмжээ 2022-2025 оны хооронд 34%-иар буурчээ. АНУ-ын инвертерийн хүчин чадал 2028 он гэхэд 126 гигаватт (GW) хүрэх төлөвтэй байна.
Харин батерейны хуримтлуурын цаашдын дүр зураг Цагаан ордоноос 2026 оны 12 дугаар сарын 24-нд гарах журмын нарийвчилсан зохицуулалтаас шууд хамаарах юм байна. Энэхүү захирамж нь батерейны эрчим хүчний хуримтлуурын системийг хамрах бөгөөд үүнд чухал дэд бүтцийг дэмждэг тасралтгүй тэжээлийн системийг (UPS) тусгайлан зааж өгсөн байна. Ингэснээр дата төвүүдийн эрчим хүчний найдвартай байдлыг хангахад ашигладаг тоолуурын ардах (behind-the-meter) батерейны системүүд хүртэл үүнд хамаарахаар байна. Өнөөдрийн байдлаар АНУ-ын лити-ион батерейны импортын хувиар Хятадын дараа Өмнөд Солонгос (15%), Япон (13%) орж байгаа ч Хятадын энэхүү нийлүүлэлтийн хэмжээг орлож чадах өөр ямар ч хувилбар одоогоор байхгүй байна.
