Хэлцлийн хүрээнд Titan компанийн Австрали дахь нэгж Titan Australia Mining нь Global Lithium-ийн хувьцаа бүрийг 1.15 австрали доллароор бэлнээр худалдан авах санал гаргасан байна. Энэ нь Global Lithium-ийн есдүгээр сарын 18-ны хаалтын ханшаас 73 орчим хувийн нэмэгдэлтэй үнэ юм. Titan-ийн худалдан авах гол сонирхол нь Баруун Австралийн Goldfields бүсэд байрлах Manna литийн төсөл юм. Уг төсөл нь Калгурли хотоос зүүн тийш ойролцоогоор 100 гаруй километрийн зайд оршдог бөгөөд Global Lithium тус төслийг бүрэн эзэмшдэг. Manna төслийн эдийн засгийн үзүүлэлт сүүлийн шинэчилсэн судалгаагаар сайжирсан байна. Компани Manna болон ойролцоох Nova төслүүдийг уялдуулан хөгжүүлэх хувилбарыг судалж байгаа бөгөөд энэ нь төслийн нийт үнэ цэнийг нэмэгдүүлэх боломжтой гэж үзэж байна. Titan-ийн хувьд уг худалдан авалт нь Австралийн литийн түүхий эдийн эх үүсвэрийг баталгаажуулахын зэрэгцээ Арабын Нэгдсэн Эмират улсад хөгжүүлж буй литийн боловсруулах үйлдвэрлэлтэй холбох стратегийн ач холбогдолтой юм. Тус компани Абу Даби хотод батарейны зэрэглэлийн литийн карбонат болон литийн гидроксид үйлдвэрлэх боловсруулах хүчин чадлаа хөгжүүлж байна. Хэлцэл эцэслэн хэрэгжих хүртэл Manna төслийн хөгжүүлэлтийг үргэлжлүүлэх зорилгоор Titan компани Global Lithium-д 120 сая австрали доллар хүртэлх санхүүжилт олгохоор тохиролцжээ. Санхүүжилт нь жилийн 7 хувийн хүүтэй байх бөгөөд төслийн хөгжүүлэлтийн зардал болон холбогдох төлбөрүүдийг санхүүжүүлэхэд зарцуулагдана.