Австралийн Шинэ Өмнөд Уэльс мужид байрлах “Хиллгров” алт, сурьмын уурхайгаас “Ларвотто Ресурсес” компани анхны алт болон сурьмын баяжмалаа үйлдвэрлэж эхэллээ. Тус компани уурхайн боловсруулах үйлдвэрийг шинэчлэн өргөтгөх томоохон хөтөлбөр хэрэгжүүлсний дараа үйлдвэрлэлийн эхний баяжмалыг гаргасан байна. Энэ нь “Хиллгров” төслийг дахин хөгжүүлж, олборлолтыг эхлүүлэх үйл явцын чухал үе шат болжээ. “Ларвотто Ресурсес”-ын тооцоолсноор “Хиллгров” уурхай эхний найман жилийн ашиглалтын хугацаанд жилд ойролцоогоор 4,900 тонн сурьма, 40,500 унц алт үйлдвэрлэхээр төлөвлөж байна. Тус компани үйлдвэрлэлийн хүчин чадлыг аажмаар нэмэгдүүлж, төлөвлөсөн тогтвортой түвшинд хүргэхээр ажиллаж байгаа бөгөөд цаашид төслийн ашиглалтын хугацааг олон арван жилээр сунгах боломжийг хайгуулын ажлаар тодорхойлох зорилт тавьжээ.“Хиллгров” уурхай нь Шинэ Өмнөд Уэльсийн Армидейл хотын зүүн хэсэгт, ойролцоогоор 23 километрийн зайд оршдог. Тус талбайд алт, сурьмыг 1857 оноос олборлож ирсэн түүхтэй бөгөөд төслийн нийт талбай 254 хавтгай дөрвөлжин километр байна. Анхны баяжмал үйлдвэрлэсэн нь боловсруулах үйлдвэрийн шинэчлэлийн ажлын дараа бий болсон үр дүн юм. Үйлдвэрт хүдэрт хөвүүлэн баяжуулах аргаар боловсруулалт хийж, сурьмын баяжмалыг ялган авч байна. Үүний дараа өтгөрүүлэх болон шүүх төхөөрөмжөөр дамжуулан илүүдэл чийгийг зайлуулж, тээвэрлэхэд шаардлагатай чанарын үзүүлэлтэд хүргэхээр ажиллаж байгаа аж. Компанийн мэдээлснээр үйлдвэрийн хөвүүлэн баяжуулах хэсэг болон баяжмалын шүүлтүүрүүдийг ашиглалтад оруулсан бөгөөд анхны баяжмал үйлдвэрлэснээр тогтвортой үйлдвэрлэлийн горимд шилжих дараагийн шат эхэлж байна.