KCM (Konkola Copper Mines) компани Хятадын China NERIN Engineering компанитай ойролцоогоор 498 сая ам.долларын EPC гэрээ байгуулсан байна. Уг үйлдвэрийг Замби улсын Чингола хот дахь KCM-ийн үйл ажиллагааны талбайд барихаар болжээ. Үйлдвэр нь жилд ойролцоогоор 70,000 тонн нэмэлт зэс үйлдвэрлэх хүчин чадалтай гэж тооцож байгаа юм.  Шинэ зэсийн уурхай нээхээс илүүтэй өмнөх олборлолтын балансын бус буюу ядуу агуулгатай хүдрийг уусгалтын технологиор боловсруулж, үлдсэн зэсийг нь сэргээн авах юм. China NERIN нь зураг төсөл, тоног төхөөрөмжийн худалдан авалт, барилга угсралт, суурилуулалт, туршилт, ашиглалтад оруулах болон ажилтнуудын сургалтыг хариуцан ажиллана. KCM энэ төслийг 2031 он гэхэд жилд 300,000 тонн орчим зэс болгох өргөтгөлийн төлөвлөгөөний нэг хэсэг гэж үзэж байна. 498 сая долларын хөрөнгө оруулалтаар жилд 70 мянган тонн зэсийн хүчин чадал бий болгоно гэвэл шинээр бий болгож буй жилийн хүчин чадлын нэг тонн тутамд $7,114 өртөг зардал ногдож байна. Мөн Замби улс зэсийн үйлдвэрлэлээ 2031 онд 3 сая тонн/жил болгох зорилт тавьж байгаа тул KCM-ийн энэ төсөл нь зөвхөн компанийн хэмжээний төсөл биш, улсын хэмжээнд зэсийн үйлдвэрлэлийг нэмэгдүүлэх зорилготой юм.