Канадын Ерөнхий сайд Марк Карнигийн санаачилсан хөрөнгө оруулалтын уулзалт нь дэлхийн томоохон хөрөнгө оруулагчдад тус улсын эдийн засаг, эрчим хүч, дэд бүтэц, уул уурхайн салбарын төслүүдийг танилцуулах зорилготой. Financial Times-ийн мэдээлснээр дэлхийн хөрөнгийн зах зээлд ойролцоогоор $120 их наядын хөрөнгө удирддаг байгууллагуудын төлөөлөл оролцохоор төлөвлөгдсөн байна.
Канадын санал болгож буй багцад нийт 167 төсөл багтсан бөгөөд уул уурхай, нефть хий, цөмийн эрчим хүч, төмөр зам, боомт, хиймэл оюун ухааны дата төв зэрэг олон салбарыг хамарч байна. Үүнээс уул уурхайн салбарт хамаарах 63 төсөл байгаа нь Канадын шинэ хөрөнгө оруулалтын стратегид эрдэс баялгийн салбар ямар чухал байр суурь эзэлж байгааг харуулж байна.
Энэхүү бодлогын цаад гол шалтгаануудын нэг нь дэлхийн критикал ашигт малтмалын нийлүүлэлтийн сүлжээнд эзлэх байр сууриа нэмэгдүүлэх явдал юм. Зэс, никель, литий, графит, газрын ховор элемент зэрэг ашигт малтмал нь эрчим хүчний шилжилт болон өндөр технологийн үйлдвэрлэлийн үндсэн түүхий эд болж байна.
Канад энэ давуу талаа зөвхөн олборлолтоор хязгаарлахгүй, боловсруулах үйлдвэрлэл болон дотоодын нийлүүлэлтийн сүлжээг хөгжүүлэхийг зорьж байна. Канадын Засгийн газрын мэдээллээр 2024–2034 оны хооронд тус улсад ойролцоогоор 140 уул уурхайн төсөл төлөвлөгдөж байгаа бөгөөд нийт боломжит хөрөнгө оруулалтын хэмжээ нь $117.1 тэрбумд хүрч байна. Үүний ойролцоогоор тал нь критикал ашигт малтмал олборлох, боловсруулах төслүүд юм.
Энэ бодлого нь зөвхөн уул уурхайн салбарын өсөлтийн асуудал биш. Канад улс АНУ-ын эдийн засаг, худалдааны бодлогоос хэт хамааралтай байдлаа бууруулж, Европ болон Азийн зах зээлд илүү хүчтэй байр суурь эзлэхийг зорьж байна.
Тус улсын хувьд эрдэс баялаг нь шинэ хөрөнгө оруулалт татах нэг төрлийн стратегийн давуу тал болж байна. Ялангуяа цахилгаан автомашин, батарей, хагас дамжуулагч, дата төв, цэвэр эрчим хүчний үйлдвэрлэл нэмэгдэхийн хэрээр найдвартай түүхий эдийн нийлүүлэлт хөрөнгө оруулагчдын шийдвэрт улам чухал болж байна.
Канадын жишээ Монголд ч тодорхой сургамжтай. Байгалийн баялаг ихтэй улс зөвхөн олборлолтын хэмжээг нэмэгдүүлэхээс гадна хайгуул, боловсруулах үйлдвэр, дэд бүтэц, эрчим хүч, тээвэр болон технологийн салбарын хөрөнгө оруулалтыг нэгтгэсэн бодлого хэрэгжүүлж чадвал уул уурхайн салбарын эдийн засагт оруулах өгөөжийг нэмэгдүүлэх боломжтой.