Гуанжөүгийн фьючерсийн биржид хамгийн идэвхтэй арилжаалагдсан литийн карбонатын гэрээ лхагва гарагт тонн нь 152,500 юань буюу ойролцоогоор 22,500 ам.долларт хүрч хаагджээ. Энэ нь долдугаар сарын доод түвшнээс 11%-иар өссөн үзүүлэлт юм.
Литийн үнэ 2026 он гарснаас хойш 29%, өнгөрсөн нэг жилийн хугацаанд 87%-иар өссөн байна. Гэсэн хэдий ч энэ нь тавдугаар сарын дундуур хүрсэн хоёр жилийн дээд түвшин болох 200,000 юаниас ойролцоогоор 25%-иар доогуур хэвээр байна.
BMI 2026 онд Хятадын литийн карбонатын дундаж үнийн төсөөллөө тонн тутамд 20,100 ам.доллар болгон нэмэгдүүлсэн байна. Энэ нь өнгөрсөн жилийн дундаж үнэ болох 10,502 ам.доллараас бараг хоёр дахин өндөр үзүүлэлт юм.
Мөн литийн гидроксидын 2026 оны дундаж үнийн таамгийг 19,600 ам.долларт хүргэжээ.
BMI үнийн таамгаа өсгөсөн гол шалтгаанаар нийлүүлэлтийн тасалдал үргэлжилж байгаа болон эрчим хүч хадгалах системийн салбарын эрэлт тогтвортой байгааг нэрлэсэн байна.
Гэхдээ энэ нь литийн үнийн өсөлтийг бүрэн дэмжсэн “өсөх” төлөв биш юм. Учир нь Хятадын литийн карбонатын спот үнэ он гарснаас хойш дунджаар 22,941 ам.долларт хүрсэн бөгөөд BMI-ийн бүтэн жилийн төсөөлөл нь оны үлдсэн хугацаанд үнэ мэдэгдэхүйц буурахыг илэрхийлж байна.
Тус байгууллага III улирлын дундаж үнийг 17,200 ам.доллар, IV улирлынхыг 16,800 ам.доллар байна гэж тооцоолжээ.
BMI-ийн үзэж буйгаар одоогийн үнийн түвшин нь зах зээлийн суурь эрэлт, нийлүүлэлтийн нөхцөлөөр тайлбарлагдахаас аль хэдийн давсан байна.
BMI литийн үнийн засвар 2026 оноор дуусахгүй гэж таамаглаж байна.
Тус байгууллага литийн карбонатын дундаж үнэ 2027 онд 16,500 ам.доллар, 2028 онд 14,500 ам.доллар хүртэл буурна гэж үзжээ. Үүний дараа үнэ 2029 онд 17,500 ам.доллар, 2030 онд 18,500 ам.доллар болж сэргэх төлөвтэй байна.
BMI-ийн тооцооллоор литийн зах зээл энэ арван жилийн эцэс хүртэл нийлүүлэлтийн илүүдэлтэй хэвээр байх бөгөөд зөвхөн 2031-2035 онд алдагдалтай зах зээлд шилжинэ.
2024-2025 оны үнийн уналтын үед хөрөнгө оруулалт буурч, шинэ төслүүд хойшлогдсон нь нийлүүлэлтийн өсөлтийг цаашид хязгаарлах гол хүчин зүйл болно гэж BMI үзэж байна.
BMI дэлхийн литийн үйлдвэрлэл 2026 онд 13.2%-иар өснө гэж тооцоолжээ. Үүнд Австрали, Хятад тэргүүлэх байр суурь эзэлнэ.
Үнэ өссөнөөр өмнө нь зогсоосон өндөр өртөгтэй уурхайнууд дахин ашиглалтад орох хандлагатай байгаа аж.
Австралийн Mineral Resources компани Bald Hill уурхайгаа дахин ажиллуулахаар төлөвлөж байгаа бол Core Lithium Finniss төслийн үйл ажиллагааг сэргээж байна. Харин Хятадын Jianxiawo уурхай бүрэн хүчин чадлаар эргэн ажиллавал дэлхийн нийт литийн нийлүүлэлтийн ойролцоогоор 3%-ийг дангаараа нэмэх боломжтой.
Зах зээлийн хамгийн том тодорхойгүй хүчин зүйл нь CATL-ийн Jianxiawo уурхай хэзээ дахин ажиллах вэ гэдэг асуудал болж байна.
Орон нутгийн экологийн байгууллагын мэдээллээр наймдугаар сарын эхээр тус уурхайд хүдэр ачих болон бутлах ажиллагаа явагдаагүй бөгөөд байгаль орчны нөлөөллийн үнэлгээ нь одоогоор батлагдаагүй байна.
Benchmark Mineral Intelligence-ийн тооцоолсноор Jianxiawo уурхайн нийлүүлэлт дэлхийн нийт литийн нийлүүлэлтийн 4 орчим хувийг эзэлдэг. Хэрэв уурхайн үйл ажиллагаа удаан хугацаагаар саатвал энэ оны нийлүүлэлтийн илүүдлийг бүрэн арилгах хэмжээний нөлөө үзүүлж болзошгүй.
Үүний зэрэгцээ Өмнөд Америкт өвлийн цаг агаар нийлүүлэлтэд нэмэлт дарамт болж байна. Долдугаар сарын сүүлээр Аргентины Катамарка мужид хүчтэй цасан шуурга болж, Rio Tinto компанийн Salar del Hombre Muerto дахь жилд 32,000 тонн үйлдвэрлэх хүчин чадалтай Fenix төслийн үйл ажиллагаанд саад учруулжээ.
BMI литийн үнэ огцом унахгүй байх гол шалтгаан нь эрчим хүч хадгалах системийн эрэлт гэж үзэж байна.
Хятадын эрчим хүч болон эрчим хүч хадгалах зориулалттай батарейн үйлдвэрлэл тавдугаар сард 191.7 GWh-д хүрч, өмнөх оны мөн үеэс 55%-иар өссөн байна.
Мөн BMI-ийн эрчим хүч, сэргээгдэх эрчим хүчний судалгааны багийн төсөөллөөр дэлхийн батарей хадгалах системийн хүчин чадал одоогийн ойролцоогоор 325 GW-оос 2035 он гэхэд 1,270 GW болж, бараг дөрөв дахин өсөх төлөвтэй байна.
Өнөөгийн суурилагдсан хүчин чадлын дөрөвний гурваас илүү хувийг Хятад болон АНУ бүрдүүлж байна.
Литийн төмөр фосфат буюу LFP төрлийн батарейн хэрэглээ нэмэгдэж байгаа нь литийн карбонатын эрэлтийг мөн дэмжиж байна. Олон улсын эрчим хүчний агентлагийн мэдээллээр LFP батарей дэлхийн цахилгаан автомашины батарейн талаас илүү хувь, эрчим хүч хадгалах системийн батарейн 90 гаруй хувийг бүрдүүлдэг.
Хятадын батарейн суурилуулалтад LFP-ийн эзлэх хувь зургадугаар сард түүхэн дээд хэмжээ болох 83.3%-д хүрчээ.
Нөгөө талаас дэлхийн литийн эрэлтийн өсөлт эрс удаашрах төлөвтэй байна.
BMI 2026 онд дэлхийн литийн эрэлт 5.8%-иар өснө гэж тооцоолж байгаа нь 2025 оны 18.5%-ийн өсөлтөөс мэдэгдэхүйц бага үзүүлэлт юм.
Үүний гол шалтгаан нь цахилгаан автомашины борлуулалтын өсөлт саарч байгаатай холбоотой. BMI дэлхийн цахилгаан автомашины борлуулалт энэ онд ердөө 3.9%-иар өснө гэж таамаглажээ.
Хятадын цахилгаан автомашины зах зээл мөн “бүтцийн удаашрал”-д орж байгаа гэж BMI дүгнэсэн байна. Гэсэн хэдий ч шинэ эрчим хүчний автомашин тус улсын шинэ автомашины борлуулалтын 58.5%-ийг эзэлж, зургадугаар сард сарын экспорт анх удаа 500,000 ширхэгийг давжээ.
Ойрхи Дорнодын мөргөлдөөнөөс шалтгаалсан шатахууны үнийн өсөлт нь цахилгаан автомашины эрэлтийг хүлээлтээс хурдан нэмэгдүүлэх боломжтой хүчин зүйл гэж BMI үзэж байна.
Урт хугацаанд литийн зах зээлд хамгийн том эрсдэл нь батарейн технологийн өөрчлөлт байж болзошгүй.
CATL-ийн Naxtra натрийн-ион батарей нь эрчим хүчний нягтын үзүүлэлтээр LFP батарейтай ойролцоо түвшинд хүрсэн байна. Changan компани натрийн-ион батарейгаар ажилладаг суудлын автомашин гаргахаар төлөвлөж байгаа бол CATL энэ онд 20,000 хүртэлх цахилгаан автомашинд натрийн-ион батарей ашиглана гэж тооцоолжээ.
Үүн дээр батарей дахин боловсруулах технологийн хурдацтай хөгжил нэмэгдэж байгаа нь литийн анхдагч түүхий эдийн эрэлтийг цаашид бууруулах эрсдэлтэй.
Иймээс BMI-ийн шинэчилсэн төсөөллөөр литийн үнэ 2026 оны өсөлтийн дараа дахин буурч, энэ арван жилийн ихэнх хугацаанд өнөөгийн түвшнээс доогуур байх төлөвтэй байна.
