Зэсийн үнэ түүхэн дээд хэмжээндээ дөхөн арилжаалагдаж буй энэ үед уг мэдэгдэл нь дэлхийн зах зээл дэх нийлүүлэлтийн түгшүүрийг улам нэмэгдүүлж байна.
Тус компанийн мэдээлснээр, "Камоа-Какула" (Kamoa-Kakula) цогцолбороос авах тэдний олборлолтын хэмжээ энэ жил 57,000 тонн хүртэлх хэмжээгээр буурах төлөвтэй байна. Уг уурхай нь өнгөрсөн жил газар хөдлөлтийн идэвхжил болон түүний дараа үүссэн үерийн улмаас үйл ажиллагаагаа зогсоож байсан бөгөөд одоог хүртэл үйлдвэрлэлээ бүрэн сэргээж амжаагүй байгаа юм. "Zijin" компани тус төслийн 44 хувийг эзэмшдэг бөгөөд тус компани энэхүү мэдэгдлээ өнгөрсөн Баасан гарагт нийтэлсэн хагас жилийн тайландаа дурджээ.
Олборлолт буурах эрсдэлүүд үүссэн нь дэлхийн зах зээл дээр зэсийн үнэ эргээд нэг тонн нь 14,000 ам.доллароос давж, энэ оны эхээр тогтоосон түүхэн дээд хэмжээндээ дөхөхөд нөлөөлөөд байна. Цахилгаанжуулалт болон хиймэл оюун ухааны (AI) дэд бүтцийн хурдацтай бүтээн байгуулалтаас шалтгаалан зэсийн урт хугацааны эрэлт өндөр байгаа тул томоохон уурхайнуудад нийлүүлэлт саатах явдалд зах зээл маш мэдрэг байна.
Хятад, Серби болон Конго улсын бусад бүс нутагт зэс олборлодог Zijin компани 2026 онд нийт 1.2 сая тонн зэс олборлохоор зорилт тавиад байгаа юм. Өнгөрсөн дөрөвдүгээр сард "Камоа-Какула" уурхайн түншүүдийн нэг болох "Ivanhoe Mines" компани тус уурхайн 2026 оны олборлолтын таамаглалаа өмнө нь төлөвлөж байсан 380,000–420,000 тонноос бууруулж, 290,000–330,000 тонн болгон өөрчилсөн байна.
