Энэхүү санхүүжилт нь АНУ-ын уул уурхай, ашигт малтмал боловсруулах үйлдвэрлэлийг өргөжүүлж, Хятадаас хэт хамааралтай байдлыг бууруулах зорилготой төрийн бодлогын хүрээнд хэрэгжиж байна.
Ерөнхийлөгч Дональд Трамп АНУ-ыг “дэлхийн ашигт малтмалын супер гүрэн” болгох зорилтоо зарласнаас хэдхэн долоо хоногийн дараа энэхүү санхүүжилт батлагдсан байна. АНУ-ын Засгийн газар сүүлийн үед зээл, буцалтгүй тусламж, төрийн хөрөнгө оруулалт болон бусад санхүүгийн арга хэрэгслээр дамжуулан дотоодын олборлолт, боловсруулалтын төслүүдийг дэмжих болсон. Гол зорилго нь эдийн засаг болон үндэсний аюулгүй байдалд чухал ач холбогдолтой ашигт малтмалын найдвартай дотоодын нийлүүлэлтийн сүлжээг бий болгох явдал юм.
Ираны дайн зэрэг томоохон геополитикийн мөргөлдөөнүүд энэхүү бодлогын ач холбогдлыг улам нэмэгдүүлж байна. Ялангуяа зэвсгийн нөөцийг нөхөн бүрдүүлэхэд шаардлагатай үйлдвэрлэлийн хүчин чадал болон түүхий эдийн нийлүүлэлтэд дайн хэрхэн дарамт учруулж болохыг АНУ-ын Засгийн газар онцолжээ.
Эрчим хүчний яамны Battery Materials Processing болон Battery Manufacturing хөтөлбөрүүдийн гурав дахь шатны санхүүжилтэд хэдэн зуун компани төсөл ирүүлсэн байна. Харин сонгогдсон төслүүд нь “Америкийн иргэдэд хамгийн өндөр өгөөж өгөх, батарейн экосистемд хамгийн их шаардлагатай чиглэлүүдэд хамгийн ирээдүйтэй” төслүүд байсан гэж тус яамны туслах нарийн бичгийн дарга Одри Робертсон мэдэгджээ.
Лити олборлолтын салбарт Lilac Solutions компанид 100 сая ам.долларын санхүүжилт олгоно. Тус компани Юта мужийн Их Давст нуурын бүсэд шууд литийн олборлолтын технологид суурилсан боловсруулах үйлдвэр байгуулах бөгөөд 2028 он гэхэд ашиглалтад оруулахаар төлөвлөж байна. Үйлдвэр бүрэн хүчин чадлаараа ажилласнаар жилд 5,000 тонн литий үйлдвэрлэх зорилготой. Lilac Solutions нь BMW-ийн дэмжлэгтэй компани юм.
АНУ-ын Эрчим хүчний яам өмнө нь ioneer, Standard Lithium болон Lithium Americas компанийн литийн төслүүдэд мөн санхүүжилт олгохоор зарлаж байсан.
Кобальтын салбарт Idaho мужид томоохон кобальтын орд эзэмшдэг Jervois компанид мөн 100 сая ам.доллар олгоно. Тус хөрөнгө оруулалтаар АНУ-д кобальт боловсруулах цорын ганц үйлдвэрийг байгуулах юм. Кобальт нь цахилгаан автомашины батарей, электрон төхөөрөмжөөс гадна төрөл бүрийн зэвсгийн үйлдвэрлэлд ашиглагддаг стратегийн металл юм.
Jervois компани зах зээлийн үнэ удаан хугацаанд бага түвшинд байсантай холбоотой урьдчилан тохиролцсон дампуурлын ажиллагааны дараа өнгөрсөн онд хувийн өмчид шилжсэн. Гэсэн хэдий ч кобальтын эрэлт олон салбарт өндөр хэвээр байгаа бөгөөд дотоодын нийлүүлэлтийг нэмэгдүүлэх нь стратегийн ач холбогдолтой гэж Робертсон тайлбарлав. Цаашид тус үйлдвэр далайн гүний зангилаанаас гарган авсан түүхий эдийг боловсруулах боломжтой гэж тэр мөн дурджээ.
Батарейн дахин боловсруулалтын чиглэлээр ажилладаг Nth Cycle компани 100 сая ам.долларын санхүүжилт авна. Trafigura-ийн дэмжлэгтэй тус компани батарейгаас дахин боловсруулах боломжтой металл агуулсан “black mass” буюу хар нунтаг хаягдлыг боловсруулах үйлдвэр байгуулахаар төлөвлөж байна.
АНУ-ын Засгийн газар энэ сарын эхээр black mass-ийн экспортод хязгаарлалт тогтоосон. Эрчим хүчний яамны мэдээлснээр шинэ санхүүжилт нь экспортын хоригтой шууд холбоогүй боловч АНУ өөрийн нутаг дэвсгэрт батарей болон black mass-ийг бүрэн дахин боловсруулж, боловсруулах үйлдвэрлэлийн экосистемийг бий болгох шаардлагатай гэж Робертсон онцолсон байна.
Үүнээс гадна Princeton NuEnergy, Arcanum Ventures болон Coreshell Technologies компани тус бүр 50 сая ам.долларын санхүүжилт авна. Princeton NuEnergy нь батарейн катодын эд ангиудыг дахин боловсруулах чиглэлээр ажилладаг бол Arcanum Ventures батарейн электролитод ашиглах химийн бодис үйлдвэрлэдэг. Харин Coreshell Technologies нь батарейн анодод уламжлалт графитын оронд цахиур ашиглах технологи хөгжүүлж байна.
Ийнхүү АНУ литий, кобальт, батарейн түүхий эд болон дахин боловсруулах үйлдвэрлэлд төрийн шууд санхүүжилт оруулах замаар дотоодын нийлүүлэлтийн сүлжээг бэхжүүлэх алхмаа эрчимжүүлж байна. Энэ нь Хятадын давамгайллыг бууруулахын зэрэгцээ цахилгаан автомашин, эрчим хүч хадгалах систем, электроник болон батлан хамгаалах үйлдвэрлэлд шаардлагатай стратегийн ашигт малтмалын хангамжийг дотоодоос бүрдүүлэх урт хугацааны бодлогын нэг хэсэг болж байна.
