Канадын холбооны засгийн газар уг төслийг Хойд Америкийн түүхэн дэх хамгийн том цэвэр эрчим хүчний хөрөнгө оруулалт хэмээн тодорхойлж байгаа бөгөөд нийт 10 тэрбум канад доллар буюу ойролцоогоор 7.2 тэрбум ам.долларын хөрөнгө оруулалт хийхээр төлөвлөжээ.
Карни Ньюфаундленд ба Лабрадор мужийн Ерөнхий сайд Тони Уэйкхэм, Квебек мужийн Ерөнхий сайд Кристин Фрешетт нарын хамт төслийг танилцуулсан байна. Хөрөнгө оруулалтын гол хэсэг нь Канадын хоёр дахь том усан цахилгаан станц болох Churchill Falls-ийн хүчин чадлыг одоогийнхоос нь бараг гурав дахин нэмэгдүүлэхэд чиглэнэ.
“Бид эрчим хүчээ эзэмшиж, удирдаж чадвал хувь заяагаа өөрсдөө тодорхойлно. Хамтын ажиллагаанд тулгуурласан холбооны тогтолцоогоор дамжуулан асар их боломжоо нээж байна” гэж Карни хэлжээ.
Лабрадор хотын ойролцоогоор 245 км зайд байрлах Churchill Falls усан цахилгаан станц нь Канадын эрчим хүчний системд чухал байр суурь эзэлдэг. Шинэ хөрөнгө оруулалтаар одоо байгаа станцыг шинэчлэхийн зэрэгцээ Churchill болон Muskrat Falls станцуудын хооронд Gull Island усан цахилгаан станцыг шинээр байгуулах юм.
Мөн хоёр станцыг холбож, үйлдвэрлэсэн цахилгаан эрчим хүчийг Квебек муж руу дамжуулахын тулд 600 гаруй км урт цахилгаан дамжуулах шугам шинээр барихаар төлөвлөжээ.
Энэхүү эрчим хүчний дэд бүтцийн өргөтгөл нь зөвхөн цахилгаан үйлдвэрлэлийг нэмэгдүүлэхээс гадна Лабрадорын уул уурхайн бүсийн хөгжлийг эрчимжүүлэх ач холбогдолтой гэж Канадын засгийн газар үзэж байна.
Тодруулбал, цахилгаан дамжуулах сүлжээг өргөжүүлснээр Лабрадорын төмрийн хүдрийн бүсэд байрлах уул уурхайн үйл ажиллагаанд илүү найдвартай, хүртээмжтэй эрчим хүч нийлүүлэх боломж бүрдэх юм.
Ньюфаундленд ба Лабрадор мужийн Ерөнхий сайд Тони Уэйкхэм тус мужийн байгалийн баялгийг хөгжүүлэхэд орон нутгийн иргэд илүү их үр өгөөж хүртэх ёстойг онцолсон байна. Түүний хэлснээр шинэ эрчим хүчний хүчин чадал нь муж өөрийн нөөц баялгаа эдийн засгийн хөгжилд ашиглах эсвэл гадаад зах зээлд эрчим хүч хэлбэрээр борлуулах эсэхээ өөрөө шийдэх боломжийг нэмэгдүүлнэ.
Үүний зэрэгцээ Канадын Байгалийн нөөцийн яамны First and Last Mile Fund хөтөлбөрөөр дамжуулан холбооны засгийн газар Лабрадорын баруун хэсэгт нэмэлт цахилгаан эрчим хүч хүргэхэд шаардлагатай цахилгаан дамжуулах шугам болон дэд станцуудын судалгаанд 2.3 сая канад доллар буюу 1.65 сая ам.долларын санхүүжилт олгохоор болжээ.
Энэхүү дэд бүтцийн өргөтгөл нь бүс нутгийн хэд хэдэн уул уурхайн төслийн эрчим хүчний хангамжийг сайжруулах боломжтой. Тэдгээрийн дотор Kami төмрийн хүдрийн уурхай болон Lac Knife графитын уурхай багтаж байна. Мөн Лабрадорын бүс нутагт хэрэгжиж буй болон төлөвлөгдөж буй бусад уул уурхайн төслүүдэд шинэ эрчим хүчний сүлжээ ашиг тусаа өгөхөөр байна.
Лабрадорын бүс нутаг нь төмрийн хүдэр, графит зэрэг стратегийн ач холбогдол бүхий ашигт малтмалын нөөцөөрөө Канадын уул уурхайн салбарт чухал байр суурь эзэлдэг. Тиймээс усан цахилгаан станцын хүчин чадлыг нэмэгдүүлж, 600 гаруй км-ийн шинэ дамжуулах сүлжээ байгуулах нь зөвхөн эрчим хүчний салбарын хөрөнгө оруулалт бус, уул уурхайн үйлдвэрлэлийн ирээдүйн өсөлтийг дэмжих стратегийн дэд бүтцийн төсөл болох юм.
Канад улс сүүлийн жилүүдэд эрчим хүчний шилжилт болон критик ашигт малтмалын нийлүүлэлтийн сүлжээг бэхжүүлэхэд анхаарч байгаа. Энэ хүрээнд Лабрадорын төмөр, графит зэрэг нөөцийг дотоодын болон олон улсын зах зээлд нийлүүлэхэд шаардлагатай эрчим хүч, тээвэр, дэд бүтцийг зэрэгцүүлэн хөгжүүлэх нь тус улсын уул уурхайн стратегийн нэг хэсэг болж байна.
Churchill Falls-ийн хүчин чадлыг нэмэгдүүлэх, Gull Island төслийг хэрэгжүүлэх болон цахилгаан дамжуулах шинэ шугамуудыг барих төлөвлөгөө бүрэн хэрэгжсэнээр Лабрадорын баруун хэсгийн уул уурхайн төслүүдийн эрчим хүчний хүртээмж нэмэгдэж, бүс нутгийн шинэ уурхайн төслүүдийг хөгжүүлэх боломж өргөжих төлөвтэй байна.
