Газар доорх уурхай болон баяжуулах үйлдвэрийг барьж байгуулахад ойролцоогоор дөрвөн жил шаардагдах бөгөөд бүрэн хүчин чадлаараа ажиллах үед жилд 30 сая фунт уран үйлдвэрлэхээр төлөвлөжээ. Харьцуулбал, Cameco компанийн McArthur River–Key Lake уурхайн цогцолбор нь жилд 25 сая фунт уран үйлдвэрлэх зөвшөөрөлтэй бөгөөд 2026 онд 14-16.5 сая фунт уран олборлохоор төлөвлөж байна.

NexGen компани Rook I төслийн бүтээн байгуулалтын эхлэлийг “ирээдүйн цөмийн эрчим хүчний өсөн нэмэгдэж буй хэрэгцээнд тэргүүлэх уран нийлүүлэгч болох зорилгод хүрэх томоохон алхам” хэмээн тодорхойлжээ.

NexGen-ийн мэдээлснээр төслийн талбайд газар шорооны томоохон ажил болон гадаргуугийн дэд бүтцийн бүтээн байгуулалт хэдийн эхэлсэн байна. 3,000 футын урттай нисэх зурвасыг ашиглалтад оруулсан бөгөөд талбайн ажилчдад зориулсан байр, дэд бүтэц бүрэн дуусаж, ашиглаж эхэлжээ.

Компани нисэх зурвасын нийт уртыг 5,840 фут хүртэл өргөтгөх ажлыг энэ оны эцэс гэхэд дуусгахаар төлөвлөж байна. Харин уурхайн босоо амны бүтээн байгуулалтыг 2027 онд эхлүүлэхээр төлөвлөжээ.

Канадын Цөмийн аюулгүй байдлын комисс өнгөрсөн гуравдугаар сард NexGen-ийн байгаль орчны үнэлгээг баталж, Rook I төслийн талбайн бэлтгэл болон уурхайн бүтээн байгуулалтыг эхлүүлэх зөвшөөрлийг олгосон. Ингэснээр төслийг барьж байгуулахад шаардлагатай зохицуулалтын эцсийн гол шат давсан юм.

2021 онд боловсруулсан ТЭЗҮ-д Rook I уурхайг 11 жилийн ашиглалтын хугацаатай байхаар тооцож, нийт 233.6 сая фунт шар нунтаг уран (yellowcake) үйлдвэрлэх боломжтой гэж үзсэн байна.

Мөн уг ТЭЗҮ-д татварын дараах цэвэр өнөөгийн үнэ цэнийг 8 хувийн хөнгөлөлтийн түвшинд 3.5 тэрбум канад доллар, дотоод өгөөжийн түвшинг 52.4 хувь, хөрөнгө оруулалтаа нөхөх хугацааг ердөө 0.9 жил гэж тооцоолжээ.

Rook I төсөл төлөвлөсөн хүчин чадалдаа хүрч чадвал NexGen-ийг дэлхийн томоохон уран үйлдвэрлэгчдийн эгнээнд оруулах хэмжээний үйлдвэрлэлийн цар хүрээтэй байх юм. Гэхдээ уурхайн олборлолт эхлэх хүртэл хэдэн жил үргэлжлэх бүтээн байгуулалт, хөгжүүлэлтийн үе шат хүлээж байна.