Тус компани санхүүгийн жилийн хугацаанд нийт 264.7 сая тонн төмрийн хүдэр олборлосон нь өмнөх оноос нэг хувиар өссөн үзүүлэлт болж, компанийн түүхэн дэх хамгийн өндөр үйлдвэрлэл болж байна.
Хэдийгээр төмрийн хүдрийн үйлдвэрлэл өссөн ч зэсийн салбарт сорилт үргэлжилж байна. BHP-ийн жилийн зэсийн олборлолт 1.95 сая тонн болж өмнөх оноос 3 хувиар буурсан бөгөөд ирэх санхүүгийн жилд энэ хэмжээ 1.65–1.80 сая тонн хүртэл буурах төлөвтэй байгааг компани анхааруулжээ. Үүнд Чилийн дэлхийн хамгийн том зэсийн уурхай болох Escondida уурхайн хүдрийн агуулга буурч байгаа нь голлон нөлөөлж байна.
Гэсэн хэдий ч компанийн удирдлагын зүгээс урт хугацааны өсөлтийн стратегиа өөрчлөөгүй байна. BHP нь Өмнөд Австрали дахь зэсийн төслүүддээ хөрөнгө оруулалтаа нэмэгдүүлж, дэлхийн хэмжээнд өсөн нэмэгдэж буй хиймэл оюун ухаан, дата төв, цахилгаан автомашин болон сэргээгдэх эрчим хүчний салбарын эрэлтийг хангахад анхаарч байгаа юм. Шинжээчдийн үзэж буйгаар ирэх арван жилд зэс нь компанийн хамгийн өндөр үнэ цэнтэй бүтээгдэхүүн болох төлөвтэй байна.
Нөгөө талаас Австралийн Порт Хедланд боомт дахь BHP-ийн төмрийн хүдрийн экспортын терминалын ажилчид цалин, хөдөлмөрийн нөхцлийн асуудлаар ажил хаялт эхлүүлээд байна. Энэ нь Пилбара бүсэд сүүлийн хэдэн арван жилийн хугацаанд болсон хамгийн том үйлдвэрлэлийн маргааны нэг гэж үнэлэгдэж байгаа бөгөөд ажил хаялт урт хугацаанд үргэлжилбэл төмрийн хүдрийн нийлүүлэлтэд тодорхой эрсдэл үүсгэж болзошгүй гэж шинжээчид үзэж байна.
Мөн дизель түлшний үнэ өссөн, нийлүүлэлтийн сүлжээний зардал нэмэгдсэн зэрэг хүчин зүйлүүд уул уурхайн компаниудын үйл ажиллагааны өртөгт дарамт учруулж байгаа ч BHP энэ жилийн зардлын зорилтоо хэвээр хадгалсан байна. Үүнтэй зэрэгцэн тус компани Баруун Австрали дахь Ministers North төмрийн хүдрийн шинэ төсөлд 900 сая ам.долларын хөрөнгө оруулалт баталж, 2029 оноос олборлолт эхлүүлэхээр төлөвлөжээ.
Зах зээлийн шинжээчдийн үзэж буйгаар BHP-ийн тайлан нь төмрийн хүдрийн бизнес тогтвортой хэвээр байгааг харуулсан бол зэсийн үйлдвэрлэлийн бууралтын төлөв нь дэлхийн зах зээл дэх зэсийн нийлүүлэлтийг улам хязгаарлаж, ирэх жилүүдэд үнийн өсөлтийг дэмжих хүчин зүйл болох магадлалтай байна. AI, цахилгаанжуулалт, эрчим хүчний шилжилт үргэлжилж буй энэ үед BHP урт хугацааны стратегиа зэсийн салбарт төвлөрүүлж байгаа нь салбарын ирээдүйн чиг хандлагыг илэрхийлж байна.
