Энэ нь тус компанийн Казахстанаас гаднах анхны хайгуулын төсөл болж байгаа бөгөөд Ойрх Дорнод дахь үйл ажиллагаагаа өргөжүүлэх стратегийн чухал алхам гэж үнэлэгдэж байна.
Solidcore Resources мягмар гарагт гаргасан мэдэгдэлдээ Оман улсын Khabiyat зэс-алтны төслийг хамтран хөгжүүлэхээр төрийн өмчит Minerals Development Oman компанитай хамтарсан хөрөнгө оруулалтын гэрээнд гарын үсэг зурсан тухай мэдээлжээ.
Гэрээний дагуу Solidcore Resources төсөлд үе шаттайгаар хөрөнгө оруулж, эхний ээлжид 20 хувийн эзэмшил авах бөгөөд шаардлагатай хайгуул, хөрөнгө оруулалтын нөхцөлүүдийг хангаж чадвал нийт эзэмшлийн хувиа 60 хувь хүртэл нэмэгдүүлэх боломжтой юм.
Энэхүү төсөл нь Solidcore Resources-ийн хувьд Казахстанаас гадна хэрэгжүүлж буй анхны хайгуулын төсөл болж байгаа бөгөөд компанийн бүс нутгийн өсөлт, үйл ажиллагааны төрөлжилтийг нэмэгдүүлэх урт хугацааны стратегитай нийцэж байгааг онцолжээ.
Компанийн гүйцэтгэх захирал Виталий Несис "Khabiyat төсөл нь Ойрх Дорнодын зах зээл дэх цаашдын өргөжилтийн чухал эхлэл болно. Энэхүү хамтын ажиллагаа нь компанийн олон улсын хөгжлийн шинэ үе шатыг эхлүүлж байна" хэмээн мэдэгдсэн байна.
Solidcore Resources нь өмнө нь ОХУ-д үйл ажиллагаа явуулж байсан ч 2024 онд хориг арга хэмжээтэй холбоотой эрсдэлийг бууруулах зорилгоор Орос дахь бизнесээ бүрэн худалдсан. Үүний дараагаар компани үйл ажиллагаагаа Казахстан болон бусад олон улсын зах зээлд төвлөрүүлэх бодлого баримталж эхэлсэн юм.
Одоогоор Solidcore Resources нь Казахстанын хоёр дахь том алт үйлдвэрлэгч бөгөөд үйлдвэрлэлийн хүчин чадлаа эрчимтэй нэмэгдүүлэх зорилт тавиад байна.
Компанийн удирдлага 2024 онд танилцуулсан урт хугацааны стратегидаа 2030 он гэхэд алтны эквивалент үйлдвэрлэлийг жилд нэг сая унцад хүргэх зорилго дэвшүүлсэн. Энэхүү өсөлтийг хэрэгжүүлэхдээ Төв Ази болон Ойрх Дорнод дахь худалдан авалт, нэгтгэл (M&A)-ийн боломжуудыг ашиглахаас гадна зөвхөн алт бус зэс зэрэг суурь металлын салбарт үйл ажиллагаагаа төрөлжүүлэх бодлого баримталж байгаа юм.
Сүүлийн жилүүдэд цахилгаан автомашин, сэргээгдэх эрчим хүч, эрчим хүчний дэд бүтцийн хөрөнгө оруулалт эрчимжиж байгаатай холбоотойгоор дэлхийн зах зээлд зэсийн эрэлт тогтвортой өсөх төлөвтэй байна. Үүнтэй зэрэгцэн олон уул уурхайн компани алтны бизнесээс гадна зэс зэрэг стратегийн ач холбогдолтой металлуудад хөрөнгө оруулалтаа нэмэгдүүлж байгаа бөгөөд Solidcore Resources-ийн Оман дахь шинэ төсөл нь энэ чиг хандлагатай нийцэж буй алхам гэж шинжээчид үзэж байна.
Хэрэв Khabiyat төслийн хайгуул амжилттай үргэлжилбэл Solidcore Resources зөвхөн Казахстан төдийгүй Ойрх Дорнодын уул уурхайн салбарт байр сууриа бэхжүүлэх боломжтой бөгөөд компанийн 2030 он хүртэлх үйлдвэрлэлийн өсөлтийн зорилтыг хэрэгжүүлэхэд чухал хувь нэмэр оруулах төлөвтэй байна.
