Тус компани 2030 оны жилийн эцэс хүртэл 32 тэрбум злоти буюу 8.55 тэрбум ам.долларын хөрөнгө оруулалт хийхээ амлаж, үйлдвэрлэл болон ашгийн шинэ зорилтуудаа тодорхойлсон байна.
“Стратеги 2055+” хэмээх уг төлөвлөгөөнд 2026-2030 оны хооронд дараах зорилтуудыг тусгажээ. Үүнд хүү, татвар, элэгдэл хорогдлын өмнөх тохируулсан жилийн дундаж үндсэн ашгийг 12 тэрбум злотид хүргэх, мөн жилд дундажаар 730,000 тонн борлуулах зэс үйлдвэрлэх, жилд дунджаар 1,290 тонн мөнгө олборлох юм байна.
Компанийн гүйцэтгэх захирал Ремигиуш Пашкевич хэлэхдээ: “2035 оноос хойш бид KGHM-ийг олон төрлийн түүхий эд олборлодог орчин үеийн үйлдвэрлэлийн групп болгохыг зорьж байна” хэмээн онцолж, Польш улсад “KGHM 2.0” нэртэй шинэ уурхай байгуулахаар төлөвлөж байгаагаа нэмж дурджээ.
Энэхүү шинэ төлөвлөгөөнд KGHM компани дотоодын хайлуулах үйлдвэрүүддээ ойрхон хүдрийн нөөцийг баталгаажуулах, тээвэр логистикийн зардлаа бууруулах зорилтыг тусгасан байна. Компанийн таамаглаж буйгаар зэсийн нийт үйлдвэрлэлийн 80 орчим хувийг дотоодын уурхайнуудаас, харин үлдсэн хувийг хилийн чанад дахь төслүүдээсээ бүрдүүлэх аж. Шинэ стратегид хилийн чанад дахь үйл ажиллагаанд онцгой ач холбогдол өгсөн байна. KGHM компанийн мэдээлснээр төлөвлөсөн нийт хөрөнгө оруулалтын 80 орчим хувь нь Польш дахь үндсэн бизнест, харин үлдсэн хэсэг нь Чили, АНУ, Канад дахь төслүүдэд зориулагдах аж. Компанийн 55 хувийг нь эзэмшдэг Чилийн Сиерра Горда (Sierra Gorda) болон Невада дахь Робинсон (Robinson) уурхайн үр ашгийн ачаар хилийн чанад дахь уурхайнууд нь 2025 онд тус группийн EBITDA-ийн (үндсэн ашгийн) 48 орчим хувийг бүрдүүлжээ
