Лхагва гарагт хийсэн мэдэгдэлдээ тус компани дэлхийн хэмжээнд эзэмшдэг хөнгөн цагааны үндсэн хөрөнгүүдээ худалдах нөхцөлт, заавал биелүүлэх гэрээ байгуулснаа мэдээлсэн байна. Үүнд:
- Австралийн Worsley Alumina үйлдвэрийн 86 хувийн эзэмшил,
- Өмнөд Африк дахь Hillside Aluminium үйлдвэрийн 100 хувийн эзэмшил,
- Бразил дахь MRN бокситын уурхайн 33 хувь,
- хөнгөн цагааны исэл (алумина)-ын үйлдвэрийн 36 хувь,
- хөнгөн цагаан хайлуулах үйлдвэрийн 40 хувийн эзэмшил багтаж байна.
Харин Мозамбик дахь Mozal Aluminium үйлдвэр нь одоогоор үйлдвэрлэлээ түр зогсоосон, арчилгаа, хамгаалалтын горимд байгаа тул энэхүү хэлцэлд хамрагдахгүй. Гэсэн хэдий ч уг хөрөнгийг худалдах асуудлыг South32 идэвхтэй судалж байгаагаа онцолжээ.
Хэлцлийн хүрээнд Alcoa компани South32-д:
- 3.1 тэрбум ам.долларыг бэлнээр,
- 1 тэрбум ам.долларын хувьцааг (Alcoa-ийн нийт хувьцааны ойролцоогоор 6 хувьтай тэнцэх хэмжээ),
- худалдан авч буй хөрөнгүүдтэй холбоотой 750 сая ам.долларын өр төлбөрийг өөр дээрээ авах,
- мөн 2030 он хүртэлх хөнгөн цагааны зах зээлийн үнээс хамааран нэмэлтээр 750 сая ам.доллар төлөх боломжтой нөхцөлийг тохиролцсон байна.
Хэлцэл зарлагдсаны дараа Alcoa компанийн хувьцааны ханш биржийн дараах арилжаагаар ойролцоогоор 2 хувиар буурч, нэгж хувьцааны үнэ 51 ам.доллар орчимд хүрэв. Ингэснээр компанийн зах зээлийн үнэлгээ 13.75 тэрбум ам.доллар болсон байна.
Үүнээс өмнө энэ сарын эхээр АНУ-Ираны мөргөлдөөний улмаас дэлхийн зах зээлд хөнгөн цагааны үнэ өссөнөөр Alcoa-ийн хувьцаа дөрвөн жилийн дээд түвшин болох 84.38 ам.долларт хүрч байсан юм.
Мөн South32 компанийн хувьцааны ханш Австралийн хөрөнгийн бирж дээр арилжаа эхлэх үед 2 хувиар буурч, зах зээлийн үнэлгээ нь 17.5 тэрбум австрали доллар болжээ.
South32-ийн мэдээлснээр энэхүү хэлцэл нь компанийн үйл ажиллагааг илүү төвлөрсөн бүтэцтэй болгож, цаашид зэс, цайр, мөнгө, хар тугалга зэрэг өндөр ашигтай суурь металлын төслүүдэд төвлөрөх боломжийг бүрдүүлнэ. Мөн тус компани дэлхийн томоохон манганы үйлдвэрлэгч хэвээр үлдэх зорилготой байна.
Энэхүү хэлцэл нь мөн компанийн шинэ гүйцэтгэх захирал бөгөөд удирдах захирал Мэттью Дэйли албан ёсоор ажлаа хүлээн авч буй өдөртэй давхцаж байгаа бөгөөд тэрээр энэ албан тушаалд Грэм Керрийг орлон ажиллах юм.
Ажлаа хүлээлгэн өгч буй Грэм Керр:
"Энэ хэлцэл нь хувьцаа эзэмшигчдийн үнэ цэнийг мэдэгдэхүйц нэмэгдүүлж, South32-ийг өндөр ашигтай суурь металлын олборлолтод төвлөрсөн, өсөлтийн томоохон боломжтой компани болгон өөрчлөх болно" хэмээн мэдэгдэв.
Харин шинэ гүйцэтгэх захирал Мэттью Дэйли:
"Хэлцэл дууссаны дараа манай багц өндөр чанартай, урт хугацааны ашиглалттай уурхайнуудад төвлөрөх бөгөөд шинэ бүтэц дэх EBITDA-гийн ойролцоогоор 85 хувь нь суурь болон үнэт металлын бизнесээс бүрдэхээр байна" гэж онцоллоо.
Тэрээр мөн шинэ бүтэц хэрэгжсэнээр компанийн удирдлагын болон дэмжих үйл ажиллагааны зардлыг жил бүр ойролцоогоор 125 сая ам.доллараар бууруулах боломжтой гэж мэдэгдсэн байна.
South32 ойрын жилүүдэд АНУ-ын Аризона муж дахь Taylor цайр-хар тугалга-мөнгөний төслийн олборлолтыг 55 хувиар нэмэгдүүлэх, мөн Чилийн Sierra Gorda зэсийн уурхайн өргөтгөлийг хэрэгжүүлэхээр төлөвлөж байгаа аж.
Alcoa-д 900 сая ам.долларын үр ашиг авчирна
Alcoa компанийн үзэж байгаагаар энэхүү худалдан авалт нь олборлолтоос эхлээд боловсруулалт, хайлуулах хүртэлх бүх шат дамжлагыг хамарсан үйл ажиллагааг улам бэхжүүлж, дэлхийн хэмжээнд өрсөлдөх чадварыг нь нэмэгдүүлэх юм.
Тус компани худалдан авч буй хөрөнгүүдээс цэвэр өнөөгийн үнэ цэнээр тооцоход ойролцоогоор 900 сая ам.долларын синержи буюу нэмэлт үр ашиг бий болно гэж тооцоолжээ.
Alcoa-ийн Ерөнхийлөгч бөгөөд Гүйцэтгэх захирал Уильям Оплингер:
"Энэ бол Alcoa-ийн хамгийн сайн хэрэгжүүлж чаддаг төрлийн боломж юм. Бидний худалдан авч буй эдгээр өндөр чанартай, дэлхийн хэмжээний ач холбогдолтой хөрөнгүүд манай багцад стратегийн хувьд төгс нийцэж байна" гэж мэдэгдэв.
Одоогоор Alcoa компани дэлхийн хэмжээнд долоон уурхайд эзэмшилтэй бөгөөд тэдгээрийн нэг нь Австрали дахь дэлхийн хамгийн том бокситын уурхай болох Huntly юм.
