Мексикт төвтэй тус компани пүрэв гарагт гаргасан мэдэгдэлдээ 17.75 сая ширхэг хувьцаа тус бүрийг 12 ам.доллароор үнэлсэн гэв. Компани өмнө нь IPO-оор нэгж хувьцааг 11.25-13.25 ам.долларын хооронд үнэлж, 17.75 сая ширхэгийг санал болгохоор төлөвлөж байсан бөгөөд хэлцлийн эцсийн үнийг 6 дугаар сарын 30-нд тогтоохоор товлоод байсан юм.
Тус компанийн бүртгэлийн баримтаас үзвэл, "Franco-Nevada Corp." компани энэхүү арилжаанаас 10 сая хүртэлх ам.долларын хувьцаа худалдаж авах сонирхолтой байжээ. Үүнтэй зэрэгцэн хийгдсэн хэлцлээр "Fresnillo Plc" компани IPO-ийн үнээр 110 сая хүртэлх ам.долларын хувьцаа худалдаж авахаар тохиролцсон байна. Энэхүү хаалттай байршуулалтыг хийх үндсэн нөхцөл нь IPO-оор хамгийн багадаа 199 сая ам.долларын нийт орлого олж, хувьцааны доод үнэ 11.25 ам.доллароос багагүй байх шаардлага байв.
Тус компаниас гаргасан бүртгэлийн баримтад дурдсан нийт эргэлтэд байгаа хувьцааны тоо хэмжээ болон IPO-ийн үнэд үндэслэн тооцвол "Sinda" компанийн зах зээлийн үнэлгээ 1.88 тэрбум ам.долларт хүрч байна.
"Sinda" компани нь Мехико хотоос баруун хойд зүгт орших Мексикийн Гуанахуато мужид хоорондоо залгаа орших уул уурхайн таван тусгай зөвшөөрлийг эзэмшдэг юм. Бүртгэлийн баримтад харуулснаар, уг төсөлд ойролцоогоор 369 сая унц мөнгөний эквивалент бүхий боломжит эрдсийн нөөц, мөн 16 сая унц мөнгөний эквивалент бүхий бодитой эрдсийн нөөц агуулагдаж байгаа гэж тус компани тооцоолжээ.
Тус компани 2031 он гэхэд үйлдвэрлэлээ эхлүүлэх зорилт тавин ажиллаж байгаа бөгөөд IPO-оос олсон орлогыг төслийн өрөмдлөг, хайгуул болон бүтээн байгуулалтын ажилд зарцуулахаар төлөвлөж байна.
Сүүлийн нэг жилийн хугацаанд хөрөнгө оруулагчдын эрсдэлээс хамгаалах хандлага БНХАУ-ын худалдан авалт, мөн дата төвийн хөргөлтийн систем болон нарны зайн хавтангийн үйлдвэрлэл зэрэг аж үйлдвэрийн салбар дахь хэрэглээ нэмэгдсэнтэй холбоотойгоор спот мөнгөний үнэ даруй 60 хувиар өссөн үед энэхүү IPO хийгдэж байгааараа онцлог юм.
"Sinda" компанийн ард байгалийн баялгийн салбарт мэргэшсэн хөрөнгө оруулалтын "Electrum Group" компани дэмжлэг үзүүлж байгаа аж. "Electrum"-ийн өөр нэг охин компани болох "Sunshine Silver Mining & Refining Co." нь өнгөрсөн 6 дугаар сард АНУ-ын хөрөнгийн биржид бүртгүүлж 270 сая ам.доллар босгосон бөгөөд арилжааны эхний өдөр хувьцааны ханш нь 27 хувиар өсөж байжээ. Энэхүү IPO болон хаалттай хувьцаа байршуулалтын дараа "Electrum Group" нь "Sinda" компанийн саналын эрхтэй хувьцааны 78 хувийг эзэмших хүлээлттэй байна.
Энэхүү хувьцаа гаргах ажиллагааны андеррайтераар "Morgan Stanley", "Bank of Nova Scotia" болон "Bank of Montreal" банкууд тэргүүлэн ажилласан байна. Тус компани хувьцаагаа Нью-Йоркийн хөрөнгийн бирж дээр баасан гарагаас эхлэн "SIND" гэсэн тэмдэгтээр арилжаалж эхэлнэ гэж тооцоолж байна.
