Уг захирамжаар "Tri-State Generation and Transmission Association" (Tri-State), "Platte River Power Authority", "Salt River Project", "PacifiCorp" болон "Public Service Company of Colorado" ("Xcel Energy"-ийн охин компани) зэрэг байгууллагуудад Крэйг станцын 1-р блокийг (Craig Unit 1) "Southwest Power Pool" (SPP) бүсийн эрчим хүчний нэгдсэн сүлжээний удирдлагын заавраар ажиллуулахад бэлэн байлгах, үүний тулд шаардлагатай бүхий л арга хэмжээг авахыг үүрэг болгосон байна.
Нүүрсний цахилгаан станцын 1-р блокийг анх 2025 оны эцэст хаахаар төлөвлөж байсан ч Сайд Райт 2025 оны 12-р сар болон 2026 оны 3-р сард онцгой байдлын захирамжуудыг дараалан гаргаж, "Tri-State" болон хамтран эзэмшигчдэд Крэйг станцын 1-р блокийн үйл ажиллагааг хэвийн үргэлжлүүлэх бэлэн байдлыг хангахыг даалгаж байсан юм.
Сайд Райт хэвлэлийн мэдээндээ "Найдвартай эрчим хүчний эх үүсвэрийг сүлжээнээс хасах нь эрчим хүчний найдвартай байдалд заналхийлж, Америкчуудын эрчим хүчний зардлыг үндэслэлгүйгээр нэмэгдүүлдэг" хэмээн тэмдэглэжээ.
Улс орон даяар нүүрсний цахилгаан станцуудыг хугацаанаас нь өмнө хаахаас аварч, зогсоох төлөвлөгөөнүүдийг буцааж байна хэмээн Райт хэлээд, 2025 онд 17 гигаваттын хүчин чадалтай нүүрсний цахилгаан үүсгүүрүүд сүлжээнд хэвээр үлдсэнийг нэмж дурдлаа.
Эрчим хүчний яамны "Эх үүсвэрийн хүрэлцээний тайлан"-д дурдсанаар, хэрэв АНУ найдвартай эрчим хүчний эх үүсвэрүүдээ сүлжээнээс салгасаар байвал 2030 гэхэд цахилгаан тасралт 100 дахин нэмэгдэх эрсдэлтэй байжээ.
Хойд Америкийн Цахилгаан Найдвартай Байдлын Корпорацийн (NERC) "2025 оны Урт хугацааны найдвартай байдлын үнэлгээ"-нд "WECC-Rocky Mountain" бүс нутаг нь дулааны цахилгаан станцуудын насжилтаас үүдэлтэй хүндрэлтэй тулгарч байгааг анхааруулсан байна. Энэ нь төлөвлөгөөт бус зогсолтод хүргэж болзошгүй бөгөөд нийлүүлэлтийн сүлжээний асуудал болон туслах тоног төхөөрөмж нийлүүлэгчдийн бэлэн байдлаас шалтгаалан байдал улам хүндэрч болзошгүй байгаа юм байна.
