Украин–Оросын дайны дөрөв дэх жил үргэлжилж буй энэ үед Киевийн алсын тусгалтай дроны цохилтууд Оросын газрын тос боловсруулах салбарт урьд өмнө байгаагүй дарамт учруулж эхэллээ. Сүүлийн саруудад Оросын хэд хэдэн томоохон нефть боловсруулах үйлдвэр ажиллагаагаа зогсоож, зарим бүс нутагт бензин, дизель түлшний борлуулалтад хязгаарлалт тогтоох нөхцөл үүсээд байна. Энэ нь олон нийтийн дунд “Орос нефтьгүй болсон уу?” гэсэн асуултыг дахин сөхөхөд хүргэж байгаа боловч бодит байдал дээр асуудал нь нефтийн нөөц бус, харин боловсруулах хүчин чадалд үүссэн доголдолтой холбоотой юм. Орос улс дэлхийн хамгийн том нефть олборлогч орнуудын нэг хэвээр байгаа ч Украины довтолгоонуудын улмаас шатахуун үйлдвэрлэлийн хэмжээ мэдэгдэхүйц буурч, дотоодын зах зээлд нийлүүлэлтийн хүндрэл бий болоод байна. Ийм нөхцөлд Кремль шатахууны экспортод хязгаарлалт тогтоох, зарим төрлийн түлш импортлох зэрэг онцгой арга хэмжээнүүдийг авч эхэлсэн нь нөхцөл байдлын ноцтойг илтгэж байна.
2026 оны зургаадугаар сарын сүүл гэхэд Оросын дор хаяж 17 бүс нутаг бензин, дизель түлшний борлуулалтад албан ёсны хязгаарлалт тогтоосон бөгөөд олон бүс нутагт шатахуун түгээх станцууд дээр урт дараалал үүссэн байна. Зарим газарт нэг автомашинд олгох шатахууны хэмжээг 20–50 литрээр хязгаарлажээ.
Оросын эзэмшилд байгаа Крымд нөхцөл байдал бүр хүндэрч, зарим үед иргэдэд бензин худалдаалахыг бүрэн зогсоосон байна
