Хөрөнгийн зах зээл дэх технологийн компаниудын хувьцаануудын уналт дэлхий даяар давалгаалснаар цэвэршүүлсэн алтны үнэ 2.4 хувиар буурч, ойролцоогоор 4,091 ам.долларт хүрсэн нь энэ сарын эхээр бүртгэгдсэн доод түвшинд дөхөж очсон байна. Алт нь эрсдэлээс хамгаалах найдвартай хөрөнгө оруулалтад тооцогддог хэдий ч зах зээлийг бүхэлд нь хамарсан томоохон уналтын үед хөрөнгө оруулагчид багцынхаа бусад алдагдлыг нөхөхийн тулд алтны эзэмшлээ багасгах хандлагатай байдаг тул ийнхүү үнэ нь унадаг байна. Алтны үнэ хамгийн сүүлд өнгөрсөн оны 11-р сард 4,000 ам.доллароос доош түвшинд байсан юм.
Дойче Банк алтны гуравдугаар улирлын үнийн таамаглалаа 4,300 ам.доллар болгон бууруулсан нь өмнөх төсөөллөөс тавны нэгээс илүү хувиар буурсан үзүүлэлт бөгөөд жилийн сүүлийн гурван сарын таамаглалыг 4,800 ам.доллар болгон тус тус бууруулсан байна.
Дойче Банкны энэхүү өөдрөг биш төсөөлөл нь өнгөрсөн долоо хоногт Голдман Сакс группын гаргасан шийдвэртэй адил агуулгатай байгаа бөгөөд тэд АНУ-ын Төв банк энэ онд хүүгээ бууруулахгүй гэж үзэж байгаа тул оны эцсийн таамаглалаа 500 ам.доллароор хасаж, 4,900 ам.доллар болгосон байна.
Өнгөрсөн хоёрдугаар сарын сүүлчээс алтны үнэ 22 хувиар буураад байгаа бол мөнгөний үнэ гуравны нэгээр унажээ.
Өчигдөр Нью-Йоркийн арилжаа хаагдах үеэр спот алтны ханш 1.9 хувиар буурч, нэг унц нь 4,111.57 ам.долларт хүрсэн байна. Мөнгөний үнэ 5.3 хувиар доошилж, 61.63 ам.доллар боллоо. Платинум (цагаан алт) болон палладиумын үнэ мөн уналттай байсан байна.
