Монголбанкны Мөнгөний бодлогын хорооны 2026 оны гуравдугаар сарын 20-ны өдрийн ээлжит хурлын үеэр танилцуулсан мэдээллээр өнгөрсөн жилүүдэд хэрэгжүүлсэн мөнгөний бодлогын үр дүнд инфляцын түвшин буурч, 2026 оны хоёрдугаар сарын байдлаар 6.5 хувьд хүрч, зорилтот интервалын төвшинд ойртжээ.
Монгол Улсын эдийн засаг 2025 онд 6.8 хувиар өсөхөд хөдөө аж ахуй, уул уурхай болон аж үйлдвэрийн салбарууд голлох хувь нэмэр оруулсан байна. Харин 2026 онд уул уурхайн салбарын өсөлт 5–6 хувийн түвшинд хадгалагдах төлөвтэй байгаа бөгөөд нүүрс, төмрийн хүдэр, алт зэрэг гол нэр төрлийн ашигт малтмалын олборлолт өмнөх оны түвшинд үргэлжлэхээр байна.
Улсын төсвийн тооцооллоор 2026 онд нүүрсний дэлхийн зах зээлийн үнийг тонн тутамд 70 ам.доллар байхаар тооцож, нүүрсний экспортыг 90 сая тоннд хүргэх зорилт дэвшүүлжээ. Мөн зэсийн үнийг тонн тутамд 9,700 ам.доллар байхаар төсөөлж, зэсийн баяжмалын экспортыг 1.9 сая тоннд хүргэхээр төлөвлөсөн байна.
Эдгээр үзүүлэлтийн үр дүнд уул уурхайн салбараас улсын төсөвт нийт 9.3 их наяд төгрөг төвлөрүүлэхээр тооцсон нь төсвийн орлогын томоохон эх үүсвэр болох юм. Түүнчлэн Засгийн газар хүний хөгжлийг бодлогын төвд тавьж, уул уурхайн орлогоор дамжуулан нийгэм, эдийн засгийн олон төсөл, хөтөлбөрийг санхүүжүүлэхээр төлөвлөжээ.
2026 оны төсвийн хүрээнд улсын төсвийн хөрөнгөөр нийт 11.1 их наяд төгрөгийн төсөвт өртөг бүхий 738 төсөл, арга хэмжээг хэрэгжүүлэхээр баталж, үүнд 3.3 их наяд төгрөгийн санхүүжилт олгохоор тусгасан байна.
Мөн Нийгмийн даатгалын санд 7.8 их наяд төгрөгийн орлого төвлөрүүлэхээр тооцож, улсын төсвөөс 1.6 их наяд төгрөгийн татаас олгохоор төлөвлөжээ. Тус сангийн нийт зарлагыг 6.6 их наяд төгрөгөөр баталсан байна.
Уул уурхайн салбар нь Монгол Улсын экспортын орлогын дийлэнх хэсгийг бүрдүүлдэг стратегийн ач холбогдолтой салбар бөгөөд нүүрс, зэс, алт, төмрийн хүдэр зэрэг гол бүтээгдэхүүний олборлолт, экспортын өсөлт нь улсын эдийн засгийн тогтвортой өсөлтөд чухал нөлөө үзүүлэхээр байна. Иймээс 2026 онд хэрэгжих уул уурхайн томоохон төслүүд нь эдийн засгийн идэвхжил, төсвийн орлого, хөрөнгө оруулалт, ажлын байрны өсөлтийг дэмжих гол хүчин зүйлсийн нэг байх төлөвтэй байна.
