Bloomberg-ээс нэгтгэсэн хөлөг онгоцны хөдөлгөөний мэдээллээр, 4-р сарын 11-ний амралтын өдрүүдийн байдлаар тус бүс нутаг руу чиглэсэн 30 хоногийн цэвэр ачаа тээвэрлэлт 600,000 тонноос доош орсон нь 2020 оны 6-р сараас (Ковид-19 цар тахлын улмаас Ази даяар хийн эрэлт огцом буурсан үе) хойшхи хамгийн бага үзүүлэлт юм.

Өнгөрсөн амралтын өдрүүдэд Пакистанд болсон хэлэлцээний үеэр АНУ болон Иран улсууд тохиролцоонд хүрч чадаагүй тул Азийн худалдан авагчид LNG-ийн хомсдолд орохоор байна. Ерөнхийлөгч Дональд Трамп АНУ-ын тэнгисийн цэргийн хүчээр Хормузын хоолойг бүрэн хааж эхлэхээ мэдэгдсэн нь зогсонги байдалд ороод байсан усан замын зөрчилдөөнийг улам хурцатгаж байна.

Катарын LNG нийлүүлэлтээс ихээхэн хамааралтай Пакистан улс гуравдугаар сарын эхэн үеэс хойш тус түлшийг хүлээн аваагүй байна. Өнгөрсөн сард болсон халдлагын улмаас Катар улс олборлолтоо зогсоосон юм. Хамгийн том худалдан авагч болох БНХАУ-д нийлүүлэх 30 хоногийн дундаж хэмжээ өмнөх оны мөн үеэс 30%-иар, Энэтхэгт 20%-иар тус тус буурчээ.

Япон, Өмнөд Солонгос зэрэг бусад томоохон импортлогчдын хувьд ч нийлүүлэлт сүүлийн зургаан жилийн хамгийн доод түвшинд хүрч буурав. Үүнтэй холбоотойгоор Японы зарим хийн цахилгаан станцууд ачааллаа бууруулж байгаа бол Өмнөд Солонгос улс LNG-ийн хэрэглээг танах зорилгоор нүүрсний цахилгаан станцууддаа тавьсан хязгаарлалтаа цуцалжээ.